المقاومة بالطريقة ..

يسأل الشاب الشيخ العلامه وعلامات الحيره على وجهه :

لماذا ترتدي فضيلتك الساعة في يدك اليمنى ؟

فيرد الشيخ بكل حكمة ووقار وطمأنييه :

مخالفة لليهود والنصارى عليهم لعنة الله



مشهد كوميدي رأيته بعيني أصابني بفقدان النطق لمدة ثلاث دقائق ..

أعقبتها بضحك استمر 3 ساعات ..

فالشيخ العلامه يرى من ارتداء الساعة في اليد اليمنى بدلا من اليسرى مخالفة لغير المسلمين

ولكنه لا يرى أن المخالفة - إن أراد ذلك - تكمن في عدم ارتداءه للساعة أصلا .. لأنها من صنعهم !!!

لماذا أصبح مبدأ خالفوهم مبدأ حياة لدى الكثيرين ..!!

لماذا لم تكن أنت الأصل .. وليخالفك من شاء

لماذا لم يتحدث الشيخ العلامه ليحث شباب المسلمين على العمل والاجتهاد بدلا من حثهم على المخالفه ؟؟

بلاش كده خالص ..

ليه الشيخ مثلا لم يتحدث عن أن التيامن سنّة عن النبي صلى الله عليه وسلم ؟؟


الكلام بتاع الشيخ ده ده يدل على انه شخص نصوصي جدًا ..

يعني كل اهتمامه بظاهر النص وليس معانيه وفلسفته العامة

وإنه بيبص على كل نص في حد ذاته

ومعندوش القدرة على التفكير وربطه بالمقاصد العامة للشريعة ..


والظاهرة دي بتنعكس ف حاجات كتير جدًا في حياتنا بتخلينا نبقى أشخاص علمانيين دون أن ندري

فمثلا : الإعلانات على القنوات الفضائية السلفية

التغيير الوحيد اللي قام بيه "الجماعة السلفيه " انه مبقاش فيه بنات بتعمل الإعلانات .. عشان ده حرام ..

الإعلانات بيقدمها رجالة كويسين لشركات اسلامية

كل همها الاستيراد من الصين ..!!!!

يعني " الجماعة السلفيه " شالوا الحرام الظاهر ..

لكن الحرام الكامن مكنش عندهم القدرة على الإمساك به لتمسكهم بالنصوصية

فكرة الإستهلاكية الشديدة .. اللي بينتج عنها تدمير موارد الأرض

والاستخدام الشره للسلع والمنتجات و نشر منتجات هبلة

زي كريم الشعر بتاع الدكتور كابور اللي عايش على جبال التبت

واعلاناته كانت بتيجي على شريط قناة الحكمة والرحمة

كل ده لسه موجود وقوي وزيه زي كل القنوات الغنائية والسينمائية مفرقتش أي حاجة ..

وزي ما الكلام ف القنوات دي بيبقى على رقائق ( الحب) القنوات الدينية بتقدملنا ( رقائق) الدين

وعلى كل فهما نوعين من القنوات العلمانيه جدًا .. وان كانت علمانية السلفية علمانية مقنعة


يعني مثلا موقف ثاني كمان ..

شباب مسلم متدين .. تلاقيه قاعد بيتفرج على المصارعة الحرة .. فتسأله بكل هدوء :

هي مش المصارعة حرام في الإسلام ؟؟

فيرد بكل ثقة - كالشيخ السابق - وجرأة :

طبعا .. عشان بيلبسوا شورت فوق الركبه ....!!!!!!!!


وده يدل على سطحية التفكير .. والنصوصيه ..

فلو فرضنا مثلا ان المصارع كان لابس شورت "شرعي " من السرة للركبة ..

هتبقى المصارعة حلال ؟؟!!؟؟

بالتأكيد مش هيعترض .. لأنه ميعرفش إن المصارعة الحرة بتعبر عن مفهوم الغابة وغياب الأخلاقيات و.. و..و



موضوع النصوصية برضه موجود في حاجة تانية مهمة أوي

وهي تخيلات الناس عن الدولة الإسلامية..

فالدولة الإسلامية بالنسبة لهم هي دولة اقامة الحدود وفقط

وعشان كده مثلا نشوف في مدونات إن الناس بتحلم

لما هتقوم الدولة الإسلامية مصر هتاخد كأس العالم ..!!!

أو هننتج أول شامبو اسلامي واعلاناته هتغرق الدنيا ...!!!

أو هنعمل سلاح نووي ونهدد بيه أمريكا

اللي طبعًا هتكون سقطت ...


يعني بنطلع الغل مش أكتر

ومفيش مانع نضرب بيه جزيرة ف المحيط عشان نثبت اننا رجالة وقد كلمتنا

بالتالي دي دولة اسلامية ظاهريًا فقط

انما كل تصرفاتها علمانية بحتة


كل اللي فات ده بيعني اننا استبطنا نموذج الحياة الغربي تمامًا لدرجة اننا بقينا بنقاوم بيه..

وبقى مفهومنا عن الحياة الإسلامية هو الصلاة والصوم والنصوصية في تطبيق الشريعة

لكن مفيهاش حاجة اننا نشرب كوكاكولا..

اننا نبقى اشخاص استهلاكيين جدًا ونحط لده صبغة اسلامية

ونقول وأما بنعمة ربك فحدث ...!!!



على سبيل المثال أيضا كليب فيلم ( طير انت ) لأحمد مكي

وأغاني الراب التي يقدمها الإخوان المسلمون أيضا

نجد أيضا استمرار هذا المبدأ .. عن طريق أغاني الراب

لا أتحدث عن الراب نفسه .. ولكن أتحدث أننا نستخدم فن ابتكره الغرب لنشر أفكارنا

لماذا لم " نبتكر " طريقتنا الخاصة ؟؟

لماذا لا تكون لنا طريقتنا في ارتداء الملابس ؟؟

لماذا نفتقد ذوقنا الخاص ؟؟



أطلق أحد أصدقائي الأعزاء مصطلح رائع على هذا المبدأ ..

قال لي : هو ده " المقاومة بالطريقة " .. بصراحة عجبني المصطلح ده

ووجدته العنوان الأفضل لهذا الموضوع ..



صحيح أن مبدأ خالفوهم تبعه الرسول -ص- في بعض الأمور مثل قص الشارب مع إعفاء اللحيه

ومثل أيضا صيام يوم عاشوراء مع صيام يوم بعده أو يوم قبله من باب المخالفه

ولكن هذا الأمر كان بسبب أن إعفاء اللحى مع الشراب وصيام عاشوراء

كانوا موجودين قبل ظهور الإسلام أصلا ..




يقول الرسول صلى الله عليه وسلم :

( لتتبعن سنن من كان قبلكم ، شبرا بشبر، وذراعا بذراع، حتى لو دخلوا جحر ضب تبعتموهم)

ما لفت انتباهي في الحديث هو أيضا مصطلح " جحر ضب " .. لسبب واحد

لاختياره - صلى الله عليه وسلم - لهذا المكان الضيق جدا في التشبيه ..