يوم الجمعة اللي فات .. أول امبارح ..
كنت صافي الذهن بشكل غريب .. كنت حاسس إني مبسوط أوي ..
صحيح إني صحيت على أذان الجمعة بعد ما طلع الخطيب على المنبر ..
وصحيح مفهمتش حاجة من الخطبة .. كالعادة يعني ..
وبالتالي كنت مركز مع خطبة الجامع التاني
واللي صوته أعلى من صوت الجامع اللي أنا فيه ..
وصحيح كان ورايا حاجات كتير عاوزة تخلص ..
لكن الحمد لله كنت مركز أوي في الصلاة ..
مش عارف بصراحة الشيطان كان فين ساعتها
يمكن كان وراه مشوار مع المدام بتاعته ولا حاجة ..
المهم ..
كنت مركز أوي مع الإمام وهو بيقرأ الآيات في الصلاة
والخواطر شغالة عليا زي الفل لأول مرة الصراحة ..
لكن حسيت أول مرة كأني بسمع خواتيم سورة الغاشية .. لما قرأ الإمام :
فَذَكِّرْ إِنَّمَا أَنتَ مُذَكِّرٌ
لَّسْتَ عَلَيْهِم بِمُصَيْطِرٍ
إِلاَّ مَن تَوَلَّى وَكَفَرَ .. فَيُعَذِّبُهُ اللَّهُ الْعَذَابَ الأَكْبَرَ ..
إِنَّ إِلَيْنَا إِيَابَهُمْ .. ثُمَّ إِنَّ عَلَيْنَا حِسَابَهُمْ
ريحني أوي الجزء ده من نقطة كانت شاغلة بالي فترة طويلة أوووي ..لَّسْتَ عَلَيْهِم بِمُصَيْطِرٍ
إِلاَّ مَن تَوَلَّى وَكَفَرَ .. فَيُعَذِّبُهُ اللَّهُ الْعَذَابَ الأَكْبَرَ ..
إِنَّ إِلَيْنَا إِيَابَهُمْ .. ثُمَّ إِنَّ عَلَيْنَا حِسَابَهُمْ
اللي شاغل بالي هو :
لو أنا حاكم للبلاد ( لا قدر الله ) ..
والأزهر ( أو مركز الفتوى أيا كان اسمه ) أصدر فتوى بفرضية الحجاب ..
هل وظيفتي إني ألبس الناس الحجاب بالعافية ؟؟ ..
هل هيكون ده هو تطبيق شرع الله ؟؟ ..
هل البنات اللي مش هتلبس الحجاب
وهتلبس لبس زي بتاع اليومين دول هحاسبهم عليهم
وعلى الضرر اللي هينتج من كده
زي الزواج العرفي أو الزنا ( مع اختلاف المسمى يعني ) ؟؟ ..
ولا المفروض نوضح للناس حكم الحجاب ..
والشيوخ تطلع تتكلم على الموضوع ده في كل حتة
( بدل الهذي بتاع اليومين دول )
وخلاص كده ؟؟ ..
معلش أنا أخدت موضوع الحجاب لضرب المثل ..
لأن مفيش اختلاف على فرضيته زي الصلاة كده يعني ..
وعشان عدم لبس الحجاب بيؤدي لأمراض
وأعراض مؤسفة مهلكة - من وجهة نظري القاصرة - ..
بس بجد أنا كنت حاسس " بطعم " الآيات في ريقي .. ولا زلت ..!